تامر حسنى : أنا كنت بغير من شيرين و أنا مش مجرد شخص بيغنى !!!

حول تعرض المواقع الإليكترونية الخاصة به للهجوم ، ومحاولة تدميرها ، أكد المطرب تامر حسنى أن هناك عدد من الأشخاص يحاولون إلحاق الضرر به ، لكنه رفض الإفصاح عن اسمائهم ، وقال تامر " دول اعداء النجاح واللى كانوا عاوزين يدمرونى انا شخصياً ويحرقوا بيتى ، وهو شخص و فى كام صبى معاه ، وما ينفعش أقول عليه ، ومش عاوز اتكلم على حد " .

وقال تامر " الغيرة المهنية ممكن توصل لكده ، بس اللى بيعمل كده مش مؤمن ، وعمر ما فيه حد بيفضل موجود طول عمره ، وكلها كام سنة ويطلع شاب المفروض انى اساعده ، وعمرى ما كرهت الخير لحد ، لما بدأت انا وشيرين نغنى مع بعض وكنا نبقى ماشيين فى الشارع ألاقى واحد بيقولى والنبى يا كابتن خد الكاميرا وصورنى انا وشيرين ، رغم ان احنا نجحنا مع بعض ، وانا كنت بغير من ده ، لكنها أختى ، ولكن غيرة مش بأتمنى زوال النعمة ، ولكن ركزت مع نفسى شوية وأبتديت أشتغل جد ، وعمرى ما أذيت حد ، وانا عاوز أقول للى عاوز يضرنى ، ربنا قال لو أجتمع اهل الأرض علشان ييضروا شخص مش ممكن يضروه لان ربنا مش رايد كده " .

وقال " انا مش بخاف من رسايل التهديد اللى بتجيينى على الموبايل رغم انى عارف اللى باعتها ، لأن الحارس هو الله ، وطالما انا كويس مع اهلى ومع الناس وراضى أمى وأبويا خلاص ، وان هناك فنان أرسل لى رسالة تهديد من تليفونه الشخصى ، وانا بقوله ربنا عاوز أنى اوصل للمكان ده ، انت مش موافق وزعلان ليه " .

وحول علاقتة بالداعية الإسلامى عمرو خالد وأنه طلب من إعتزال الغناء قال تامر " محصلش ودى مش عقلية عمرو خالد ، وعلاقتى بعمرو خالد علاقة اخوة ، واشتغلنا مع بعض ، وعملنا رباعيات لألبوم إجتماعى ، وهو عرف يخرج منى حاجات ، وجوايا حاجات غنى أبقى احسن و ده اللى اتعلمته منه هو والشيخ خالد الجندى ، ووقفوا جنبى فى السجن ، وقالولى احنا حاسين ان ربنا محبب فيك ناس كتير ، وقالولى طلع الحاجة الكويسة اللى عندك ، وقالولى حاجات كتير ، نفذت حاجات ، وحاجات لسه ، و فى حاجات إتخلصت منها ، لان الضغوط اللى حوليا ممكن تخليك تعمل حاجات انت مش راضى عنها " .

وقال " انا مش مستفز فى الأغانى بتاعتى ، ومش بضحك على نفسى ، و فى كلام بقوله والناس بتحرفه وانا بزعل من ده ، زى أغنية وانسى تانى اندهلك ودماغك خليها تاكلك ، الناس حرفتها وفهموها غلط " .

واستكمل " لما دخلت على النت وشوفت اللى متقال عنى ، حسيت بالمسئولية ، وانى مش مجرد شخص بيغنى وخلاص ، لأ فى أجيال طالعة وبتتاثر بيا " .