رقاصة.. وبترقص

يا مصريين بتتكسفوا من الراقصة الشرقية ليه؟ ده الرقص الشرقى ابتدا من قبل الكلام، فى العهود القديمة كانوا حول الست الحامل كتقليد وعرف متبع علشان الست الحامل تولد، ده من 7 آلاف سنة فى المعابد الفرعونية كانوا الفراعنة بيحتفلوا بالطبول وكانت الراقصة ترقص فى احتفال. بصوا على حيطان المعابد الفرعونية حتلاقوا نقوش لنساء كانوا لابسين زى الرقص الشرقى وكانت الراقصة الشرقية من 7 آلاف سنة جزءا لا يتجزأ من الحضارة الفرعونية. ووجود الراقصة الشرقية فى الحضارة الفرعونية ما منعش تقدم الفراعنة فى العلم والجراحة ومضامير مختلفة.

واستمر الرقص الشرقى فنا عربيا ينتمى ومتأصل فى هذه القطعة من الأرض إلى وصول العثمانيين أرض الكنانة. وبرضه كانت الراقصة الشرقية المصرية بالذات ترقص فى شموخ للتعبير بحركات إبداعية من غير سيف ولا بندقية عن هوية وتاريخ بلد تمتد حضارتها لـ 7 آلاف سنة. وكان مهما اتغير المحتل وحاول يفرض قوانينه ويستنزف خيرات هذه البلد، كانوا ييجوا عند الرقص الشرقى ويقفوا ويجلوا باحترام هذا الفن المعبر بحركات وإحساس عن الحزن والفرح والثورة.

لأ بقى الرقص الشرقى فن ومش قلة أدب، لأن الفن أساسه الإبداع والتعبير والإمتاع. وأى راقصة شرقية من غير ما تتكلم بحركاتها التعبيرية تقدر برقصها من غير ما تتكلم توصل الشعور بالحب، والفرحة، والهجر والانكسار كمان. الرقص الشرقى فن مرتبط بتاريخ هذه الأرض منذ العصور الأولى شئتوا أم أبيتوا. ومصر يعنى أهرامات وأربع جوائز نوبل ورقص شرقى. فى البلاد العربية لما بنشوف دبكة يعنى لبنان. العارضة يعنى السعودية. الفلامنجو يعنى أسبانيا. الرقص الشرقى يعنى مصر. وفى أى بلد عربى فى أى فرح أو جمعة ستات ينبسطوا قوى لما يلاقوا حد بيرقص مصرى ما حدش بيسأل عن رقصة أى بلد آخر.

إنتوا يعنى رافضين عشان وجود رقاصة معناه وجود قزازة خمرة؟ طب ما انتو اللى حصرتوهم فى الأماكن دى. كان فى الخمسينات ولغاية يمكن السبعينات كانوا الراقصات يتاح لهم فرصة الرقص فى حفلات أضواء المدينة وفى التلفزيون، وكانت سهير زكى آخر الراقصات اللى سمح لها إنها ترقص فى التلفزيون، لغاية ما حد أخدته الشكيمة ورفع قضية فى مجلس الشعب عشان لمنع الراقصات من الرقص على أساس إنه مش فن بس قلة أدب. رجعوا الراقصات الشرقيات يرقصوا فى حفلات التلفزيون. أو على الأقل إديلهم فرصة يرقصوا فى ساقية الصاوى، وحطوا مواصفاتكم الفنية على الملابس زى مانتوا عايزين.

الرقص الشرقى اللى المجتمع المصرى ينظر ليه كقلة أدب بيدرس فى كل بلاد العالم وكتير منهم بعد ما ياخدوا كورسين تلاتة، بييجوا مصر عشان يرقصوا. السؤال هنا بقى: هى مصر بعد ما بقت تستورد فانوس العيد، وتماثيل أبو الهول والأهرامات من الصين، هو هييجى الوقت اللى مصر هتستورد فيه راقصات شرقيات من الصين.

أنا عارفة إن الستات قبل الرجالة هيقولوا طز مش عايزين رقاصات.

من الآخر كدة إحنا النظرة الدونية للرقص الشرقى ده نابع من إننا كلنا كشعوب عربية بقينا نحكم على الأمور من منطلق الكبت والهوس الجنسى اللى بقى مسيطر على أفكارنا وتصرفاتنا. كل واحد ماشى جواه ميكرويف وفريزر فى نفس الوقت. فبقت الأمور مختلطة عندنا وكل حاجة بنحكم عليها من الإطار الجنسى مش الإنسانى الراقي، وشكرا طبعا لأنصاف المثقفين وأرباع المتعلمين أصحاب المنابر اللى الله أكبر مش مقصرين فى بث أحكامهم الجزافية الجاهلة والملايين من المشاهدين والقراء المنجرفين وراء رؤى إنما تنم عن جهل وتخلف. فأصبح فن الرقص مسخرة.

وأخيرا تعيشى يا دينا وافضلى ارقصى عشان إنت آخر راقصة مصرية، وما اعرفش مستقبل هذا الفن الذى امتد عبر آلاف سنة مصيره إيه؟