أصغر ثورية: "عاوزين رئيس ميسمعش كلام إسرائيل"

والدي فران وعلمني حب مصر

.أصغر ثورية: "عاوزين رئيس ميسمعش كلام إسرائيل"

مريم.. الثورية الصغيرة بعزبة الهجانة

كتبت: رانيا على فهمي

منذ 6 ساعة 25 دقيقة

"أنا بحب مصر جدا وبتعب قوي عشانها، كان نفسي أكون مع الشهداء اللي ضحوا
بحياتهم عشانا، ياريت كلنا نحط إدينا في إيد بعض ونحبها زي ما هي بتحبنا،
حتى لو حسينا إنها أوحش بلد في العالم كفاية إن اسمها ذُكر في القرآن عشان
نعرف إن مصر طيبة وإن الناس هي إللي بتعمل الحاجات الوحشة فيها."

برقية ترسلها مريم ،ذات العشر سنوات، لكل مصري لتذكرنا بالمثل القديم"كل
فتاة بأبيها معجبة" فبقدر محبتها لمصر بقدر حبها واعتزازها بوالدها الفران
البسيط الذي نجح أن يزرع في وجدان ابنته الصغيرة قيمة العمل وأن قيمة
الإنسان في كرامته.
التقيت بمريم في مدرسة المعز بعزبة الهجانة في يوم أعده فريق توعية إنسان
بجمعية رسالة لتعريف الطلبة بمعنى كلمة إنتخابات، ليدور بيني وبين الثورية
الصغيرة هذا الحوار ..

* مريم تعرفي إيه عن الإنتخابات؟

** انتخابات يعني نختار الإنسان اللي يفكر في مصلحة الناس كلها، وأنا
اخترت صاحبتي التي علمتني حاجات حلوة خصوصا في الدين ودائما بتصالح أي
اثنين بيزعلوا من بعض.

* وإيه المواصفات اللي نفسك تكون موجودة في رئيس مصر؟

** نفسي رئيس مصر القادم يحكم بينا بالعدل، مش يفضل أصحابه علينا ولما
يغلطوا ميحاسبهمش وفي نفس الوقت يحبس طفل جعان سرق رغيف عيش، نفسي في رئيس
ميصدرش الغاز أو الفاكهة والخضار للدول التانية بأسعار رخيصة ويرجع
يستوردها بأسعار غالية.
عاوزه الرئيس ميسمعش كلام اسرائيل وتكون قراراته لمصلحة مصر ومش لمصلحة حد تاني وميسبش الغرب يتحكموا فينا.
يعني أناساكنة في عزبة الهجانة منطقة شعبية جدا ومع ذلك كل حاجة غالية،
حتى الفول والطعمية مع إن بابا بيقول لي إن مصر غنية بس مش عارفين كل
الفلوس دي بتروح فين.

*طب لو حد قالك هختار الإنسان اللي يقدم لي مصلحة شخصية تقولي له إيه؟

** أقوله لأ متبقاش أناني مصر دي بتاعتنا كلنا وزي ما تحب لنفسك حب للناس.

* فرحانة يا مريم بالثورة؟

طبعا وكان نفسي أكون مع الشهداء اللي ضحوا بحياتهم عشان احنا كلنا نكون
أحسن، وكل ما أشوف صورتهم أفتكر كل أم أكيد زي ما أنا بحب ماما هم كمان
كانوا بيحبوا أمهاتهم.

* بابا بيشتغل إيه يا مريومة؟

** بابا فران في فرن بلدي وعلى فكرة هو بيتعب قوي ، إيده بتورم من العجين، بحس بيه وهو بيتألم وصباعه ملووح من الشغل.

* سمعتيه في يوم من الأيام بيقول زهقت بقى من البلد دي؟

** لا بابا بيحب مصر وعلمني إن الشغل عبادة وإننا لازم نستحمل عشان هي دي
بلدنا الي بنحبها وهي كمان بتحبنا، وإننا منستناش حد يدينا فلوس من عنده لا
إحنا نشتغل عشان نجيب كل إللي نفسنا فيه.

* طب واتعلمتي إيه من ماما؟

** ماما دائما تقولي مصر دي أمك الثانية يا مريم تخلي بالك منها وتدافعي
عنها، مهما روحتي مش هتلاقي زي مصر، دائما تفكرني بحديث الرسول صلى الله
عليه وسلم:" أدي الأمانة لمن ائتمنك ولا تخن من خانك" يعني حتى لو حد أذاني
ألجأ لربنا وهو هيجيب لي حقي.
عشان كده نفسي أطلع محامية وأجيب حق الناس الغلابة والمظلومين.

» نساء مصر ..............عاوزين ايه؟
» آخر كلام.. الشحات هو من أنزل علم إسرائيل من فوق السفارة
» إسرائيل تضغط لمنع لقاء نجاد بـ رئيس سويسرا
» مصر تدعوا إسرائيل للإفراج الفوري عن رئيس المجلس التشريعي الفلسطيني
» رئيس الجمعية المصرية للطب النفسى: جمال مبارك لا يعرف إلا لغة (الأنا).. وقوله إن (أمريكا ليست إسرائيل) سذاجة سياسية