قصيدة "وكأنى فلسطين"

قصيدة "وكأنى فلسطين" للشاعر عصام عبد العزيز





وكأنك دمعة ف عين الولد فلحظة يتم
وكأنك بنت صغار وبتلعب دور الأم
وكأنك أنت فلسطين
وكأنى مش عارف مين

يمكن موج وبيرسم حلمه ف وقت المد
يمكن دمعة حزينة ف عينا اتقلبت جد
يمكن نقطة دم ف سترة واد مرسوم ع الرملة ف سينا

وكأنك ترسينا
لاتنين بيحبوا ف دنيا حزينة

وكأنك فيروز فى البحر فكان درويش
(الحلوة دى قامت تعجن فى الفجرية)
والحلوة دى تشبه فى سمارها شاتيلا
صابرة
من تل الزعتر للبصرة
وف قانا بترقى عيال الشرقية ف مرايلهم
وكأنك كراريسهم
أحلامهم
مدارسهم
وكأنى كتاب مفتوح ع النيل
وكأن الناس فاهمين
بيحبوا
"جمال" و"إمام" و"جاهين"

وكأنى فلسطين
وكأنك...
مش عارف مين