بليز بلاش تريقة
انا قلت لنفسى مش معقول يا كوكى كل مواضيعك سياسية
ممكن القراء يزعلوا منك
وعلشان ما تزعلوش انا كتبت الموضوع دة علشان تلتقطوا انفاسكم
فانا مش معقول ان كل مواضيعى نكد فى نكد طبعا لازم يكون فية شوية فرفشة علشان كدة انا كتبت موضوع
بليز بلاش تريقة
هم يبكي وهم يضحك
بصوا بأه ..أولا الحكاية دي برضه من فصيلة هم يبكي وهم يضحك
..بس الصراحه يعني الصراحه ..انتوا هتضحكوا عليا أنا..هتشوفوا ..
بما اني فتاه ركيكة ..قصدي رقيقة رقيقة..و مهيضة الجناح..ههه حلوةمهيضه دي..فبليز بليز ..بلاش تريقة
الحكاية دي مايعرفهاش أي حد غير انا و ماما
..ماحكيتهاش لأي حد من أصحابي ..يعني ابقوا اتفشخروا قدام كل أصحابكم بالأمتياز ده
...حصريا على بلوجر ..حكاية العريس التاني ل عايزة أتجوز ..إقرا الحادثة ..اقرا الحادثة
احمم دية عبارة عن مقدمة للموضوع اة..مقدمة.
ادى بقى الموضوع
..عارفين ايه احساس واحده و هي ماشية في الشارع و تحس ان حد معجب بيها..مش معاكسه يعني و كده ..لأ بيبقى فيه كده
كيميا زي مابيقولوا الأجانب ..و على فكرة فيه جوازات كتير بتبدأكده ...واحد يشوف واحده في الشارع..يمشي وراها ..يعرف ساكنة فين
و يسأل عليها ويخطبها
..ابن عمي عمل كده و البت لسعته حتت قلم على وشة
..علم على صداغه 3 أيام ..قام هو اتكيف قوي و قال البت
دي واضح انها مؤدبة و متربيةوراح خطبها
..آه والنعمة..هي صحيح بعد كده اتضح ان ايديها بتطول عليه في كل المواقف مش في الموقف
ده بس ..بس و الله الراجل مبسوط و بيحلف باليوم اللي شافها فيه
..و بيلعن أبو ...والابلاش دي في مقام عمتي برضه
المهم أنا يوم نازله من البيت رايحه الشغل..حسيت بكيميا م اللي كنت بقولكم عليها دي ..حسيت ان فيه عين هتخرم قفايا ..اتديرت بسرعه
كده في الخباثة لقيتلكم راجل انما ايه ..طول بعرض بارتفاع.ماسك ف ايده شنطة سودااللى فيها ارقام
و لابس بدله و كرافته و نضارة شمس.وشعرة ملغمط بالجيل...عامل كده زي
العيال اللي كانوابيطلعوا في إعلانات جمعية شباب المستقبل "شباب الجيل
..قوام جينا ..هو ..هو" فاكرينهم ؟..المهم الواد كان حليوة و
انا قلبي هفهفله أول مالمحته ..استنيت شوية ع المحطه و بعدين جه الميكروباص..ركبت راح راكب ورايا..قلت الشياكه دي كلها هتركب
مكروباص ليه دة اكيد عندة عربية بس طبعا عايز يركب معايا
يعني..أكيد في الأمر إنا ..و جه كمان قعد جنبي ....ياحلولي يا حلولي
..بس كنت خايفه ليعاكس و ساعتها أنا ماعرفش أبويا
...باللي ف رجلي ولايهمني لا شباب المستقبل و لا ولا حاجه أبدا
..بس لاقيته في نص المسافه كده ..بيميل عليا و بيقول باسلوب رزين كده
...لو سمحتي ممكن أسأل حضرتك على حاجه ..وانتوا ماتعرفونيش.
.. باتسطل لما حد يقولي حضرتك ..بس برضه مش سهله يعني..صدرت الوش
الخشب و قلتله ..خير بمناسبة ايه ؟.
..يعني كنت عايز أسأل بس ..هوحضرتك مرتبطه
..واضح انك مش مخطوبة ولا متجوزة مافيش دبل في
ايديكي ..بس الإرتباط بأه لازم أتأكد منه من حضرتك
..(حضرتك تاني يا حلولي)..والله الكلام ده مايتقالش في مواصلات و بعدين انا ماعرفكش
و مش متعوده أكلم حد ماعرفوش
..طب يعني أنا لو معجب
بحضرتك و عندي نيه أتقدم رسمي ..أعمل ايه ..أصلي بصراحه متابعك من مده بس
دي أول مرة أتشجع و أحاول أكلمك ..ياحلاوة ياحلاوة متابعني من زمان .
..ده واقع بأه..بس برضه على مين ..لازم أثبت ..و الله لو حضرتك
متابعني زي مابتقول تبقى عارف بيتي و عارف بابايا
..هو الوحيد اللي ينفع يتكلم في المواضيع دي ..لو سمحت ماتحرجنيش اكترمن كده
..جامده جامده يعني ...الحقيقة انت كده أثبتيلي اني أحسنت الإختيار.
...ياسلام ياسلام..الله الله ..هو ده الكلام ...لحد كده الأمور كلها صح
ومية مية ..صديته آه بس كمان قلتله كلم بابا..سيبتله سكه مفتوحه يعني .
الواد بأه التباع بتاع الميكروباس راح شاخط فيا في اللحظه دي
..الأجرة ياأبله والا هتركبواببلاش.
..يابن اللذينا ..دانا عماله أترسم من ساعتها تبعتر
كرامتي كده ؟
...جيت أمد ايدي جوه الشنطه لقيتلكوا الأخ بأه راح بسرعه مطلع فلوس و محاسبلي
..لأ مايصحش ..لأ بأه اسمحيلي ..أنا لا
يمكن أقبل واحده هاتقدملها تدفع و انا موجود
...وجون وجون وجون فكرنى باجوان الواد جدو..هيتقدم لي خلاص أيوة كده هو انا صحيح ماعرفش هو بيشتغل ايه
والا عايش فين والا بيقلد فنانين والا ايه نظامه بس الجواب بيبان من عنوانه.
أول ما المكروباص وقف لقيته نزل معايا في نفس المحطه وبصلي و قاللي
..أنا حبيت أنقذك يعني في المكروباص ..واضح قوي انك
ماعاكيش فلوس
...الدم ضرب في نافوخي..وله انت هتتمنظر عليا والا ايه ؟
..واضح ان شنطتك فاضيةآخر الشهر بأه يالا وفرتلك أجرة
المكروباص تنفعك
علما بانى كنت لسة قابضة امبارح
..بصيت له بذهول كده و قلت له ..مين اللي قالك الكلام الفارغ ده
..انا عمري مامشي بشنطتي فيها أقل من 300 جنيه..
قالي باستهزاء كده وبقلب جامد..لاااااماصدقش..الدم كان خلاص قرب يطلع من نافوخي زي النافورة..رحت مطلعه كل اللي في المحفظه مورياهوله ..
أهه حتى شوف 50-100-200-220
لقيته مد ايده اخد الفلوس..و بصلها كده و عدها و قاللي آه صحيح انتي معاكي فلوس أهه
و في لحظه راح مطبقهم و حاطتهم في جيبه ..و قاللي اناهاخليهم معايا بأه سوفينير لحد لما آجيلكم البيت ..ماستوعبتش و قبل ما آخد
فرصةأقول كلمه واحده كان راكب ورا واحد على موتوسيكل شكله كده كان ماشي ورا المكروباص وهوا ..فص ملح و داب
أختكم بأه واقفه في وسط الشارع هابلااااااااااه ..زي اللي اتدلق عليها جردل مايه مش نضيف..مش عارفه أصوت والا أطلع أجري وراه والا
ألطم على وشي ...فضلت واقفه ييجي خمس دقايق في الشارع مش عارفه اروح فين والعربيات تقعد تزمرلي و لما تلاقيني مسهمة تقريبا
اللي سايقين يقولوا في نفسهم دي يا اما طارشه يا اما مجنونة يا اما م اللي بيبيعوا مناديل فى الشارع...و الناس تعدي تبصلي... و العيال الصغيرة
يشدوا في هدوم أهاليهم ..بابا بابا هي الست دي عامله كدهليه؟
بعد شوية كده لفيت و دخلت المستشفى اللي باشتغل فيها .انتم عارفين انى دكتورة
.و على وشي تعبير كده زي تعبير العمده الآلي بتاع زمان ..دخلت المكتب..
قعدت ع الكرسى..وفجأه .....انفجرت في العياط ..و الدكاترة زمايلي اتلموا حواليا..مالك ..فيه ايه يا كوكى؟...حد زعلك ..حد كلمك؟
من بين العياط و الشحتفه ما اقدرتش أقولهم غير كلمه واحده
اتسرقت
طبعا انتم عارفين ان ماما توفت من زمان وان ما فيش فى امريكا ميكروباس
وعلى فكرة انا عندى عربية حديثة
يعنى الموضوع دة ما حصلش
وانا كنت باسرح بيكم
ودة عقاب لكم لانكم تحبوا تتابعوا مواضيعى
يعن انا مش هابلة
اية رايكم فى الموضوع
بالذمة مش جميل
الرئيسية 
البوابة* 
الأربعاء 9 مارس 2011 - 19:48